Archive

Archive for 19,February, 2015

கண்துடைப்பு உணவு பொருட்கள் மீதான நடவடிக்கை உற்பத்தி தேதி குறிப்பிடாமல் விற்பனை

19,February, 2015 1 comment

காஞ்சிபுரம்: காஞ்சிபுரம் மாவட்டத்தில், உற்பத்தி தேதி மற்றும் காலாவதியாகும் தேதி குறிப்பிடப்படாமல், உணவு தின்பண்டங்கள் விற்பனை செய்யப்பட்டு வருகின்றன. இவற்றை தயாரிக்கும் நிறுவனங்கள் மீது, எந்தவித நடவடிக்கையும் எடுக்காமல், உணவு பாதுகாப்பு அதிகாரிகள் மவுனமாக இருக்கின்றனர் என, புகார் எழுந்துள்ளது.

பாக்கெட்டுகளில் அடைத்து விற்கப்படும் உணவுப்பொருட்கள் மற்றும் குளிர்பானங்கள் எப்போது தயாரிக்கப்பட்டவை என்றும், அவை காலாவதியாகும் தேதி கட்டாயமாக குறிப்பிட வேண்டும் என்ற சட்டம் விதிமுறைகள் பல ஆண்டுகளாக அமலில் உள்ளன.

திரைமறைவு வேலை

சட்டவிரோத வியாபாரங்களை தடுக்க, மாவட்டந்தோறும் உணவு பாதுகாப்பு அதிகாரிகளும் நியமிக்கப்பட்டு, ஏராளமானோர் பணியாற்றி வருகின்றனர். ஆனால், உணவு பாதுகாப்பு சட்டத்தின் கீழ் உள்ள விதிமுறைகளை பின்பற்றாமல், கோடிக்கணக்கான ரூபாய் உணவுப்பொருள் வர்த்தகம், சர்வ சாதாரணமாக இங்கு நடைபெற்று வருகின்றன. இவற்றை தடுக்க வேண்டிய உணவு பாதுகாப்பு அதிகாரிகள், திரைமறைவு வேலைகளால், நடவடிக்கை எடுக்காமல் மவுனமாக இருந்து வருகின்றனர். சமீப காலமாக, குழந்தைகள் அதிகம் விரும்பும் நொறுக்கு தீனியாக, இந்த தின்பண்டங்கள் அதிக அளவில் விற்பனையாகி வருகின்றன. விலை மலிவாக கிடைக்கும் இந்த தின்பண்டங்கள், குழந்தைகள் மத்தியில் பெரும் வரவேற்பை பெற்றுள்ளன.

விதிமீறல்

ஆனால், இந்த தின்பண்டங்கள் சுகாதாரமாக தயாரிக்கப்படுவதிலும், முறைப்படி விற்கப்படுவதிலும் பல விதிமீறல்கள் உள்ளன. உதாரணமாக, காஞ்சிபுரம் மாவட்டத்தில் உள்ள அனைத்து பெட்டிக்கடைகளிலும், பள்ளிகள் உள்ள பகுதிகளிலும் சரம் சரமாக தொங்கும் இந்த தின்பண்டங்கள், காலாவதியான உணவுப்பொருட்கள் என்ற புகார் எழுந்து உள்ளது. உள்ளூரில் தயாரிக்கப்படும் உணவு பண்டங்கள், ஆந்திர மாநிலத்தில் இருந்து வரவழைக்கப்பட்ட பாக்கெட்டுகளில் அடைத்து விற்பனை செய்யப்படுவதாகவும் தகவல் வெளியாகி உள்ளது. இந்த உணவு பண்டங்கள் எப்போது தயாரிக்கப்பட்டவை என்றும், எப்போது காலாவதியாகும் என்ற எந்த தேதியும், தயாரிக்கும் நிறுவனம் குறிப்பிடுவதே இல்லை. இவற்றை கண்காணிக்க, காஞ்சிபுரம் மாவட்டத்தில் உள்ள ஒவ்வொரு ஒன்றியத்திற்கும் உணவு பாதுகாப்பு அதிகாரிகள் உள்ளனர்.

உள்ளூரில் எந்த பகுதியில் இதுபோன்ற உணவு பொருட்கள் தயாரிக்கப்படுகின்றன என்று தெரிந்தும், எந்தவித நடவடிக்கையும் எடுக்காமல் உள்ளனர். இதுபோன்ற காலாவதியான உணவுப் பொருட்களை உண்டு, வாந்தி, மயக்கம் போன்ற உடல் உபாதைகளில் பல குழந்தைகள் பாதிக்கப்படுவதாக பெற்றோர் தெரிவிக்கின்றனர்.

நடவடிக்கை எடுக்க முடியவில்லை

எனவே, உற்பத்தியாகும் தேதியும், காலாவதியாகும் தேதியும் குறிப்பிடாமல் விற்கும் உணவு பொருட்களுக்கு, சம்பந்தப்பட்ட அதிகாரிகள் நடவடிக்கை எடுக்க வேண்டும் என, கோரிக்கை எழுந்துள்ளது. இதுகுறித்து, உணவு பாதுகாப்பு அதிகாரி ஒருவர் கூறுகையில், ”இதுபோன்ற விதிமுறை மீறி இயங்கும் நிறுவனங்கள் மீது நடவடிக்கை எடுத்தால், வியாபாரிகள் மற்றும் வர்த்தக சங்கங்கள் எங்களிடம் முறையிடுகின்றனர். ”இதுபோன்ற காரணங்களாலேயே, நடவடிக்கை எடுக்க முடிவதில்லை. இருந்தபோதிலும், இதுபோன்ற தின்பண்டங்கள் தயாரிக்கும் நிறுவனம் மீது நடவடிக்கை எடுக்கப்படும்” என்றார்.

உணவு பாதுகாப்பு அதிகாரி சோதனை 100 கிலோ டீ தூள் பறிமுதல்

19,February, 2015 Comments off

teaகடலூர்: கடலூர் முதுநகர் பகுதியில் போலி டீ தூள் பாக்கெட்டுகளை மாவட்ட உணவு பாதுகாப்பு அதிகாரிகள் ஆய்வின் போது பறிமுதல் செய்தனர். கடலூர் முதுநகர் பகுதிகளில் போலி டீ தூள் பயன்படுத்தப்படுவதாக உணவு பாதுகாப்பு அதிகாரிகளுக்கு ரகசிய தகவல் கிடைத்தது. அதன் பேரில் கடலூர் மாவட்ட உணவு பாதுகாப்பு அதிகாரி ராஜா, உணவு பாதுகாப்பு அலுவலர்கள் நத்தகுமார், சுப்ரமணியன், கொளஞ்சியார் உள்ளிட்டோர் கடலூர் முதுநகர் பகுதியில் சோதனை செய்தனர். அப்போது ஒரு வீட்டில் எந்தவித பதிவு எண்ணும் இல்லாத பாக்கெட்டுகளில் அடைக்கப்பட்டு விற்பனைக்கு வைக்கப்பட்டிருந்த டீ தூள் பாக்கெட்டுகள் இருப்பது தெரியவந்தது. இதைத் தொடர்ந்து அங்கிருந்த 100 கிலோ எடை கொண்ட பாக்கெட்டுகளை அதிகாரிகள் பறிமுதல் செய்தனர். பறிமுதல் செய்யப்பட்ட டீ தூள் மாதிரிகள் ஆய்வு முடிவில் கலப்பட டீ தூளாக இருந்தால் நடவடிக்கை எடுக்கப்படும் என அதிகாரி ராஜா தெரிவித்தார்.

Categories: Cuddalore, DISTRICT-NEWS

தஞ்சையில் உணவு பாதுகாப்பு சட்டத்தில் 7 வியாபாரிகளுக்கு அபராதம்: கலெக்டர் தகவல்

19,February, 2015 1 comment

தஞ்சாவூர், பிப். 19–

உணவு பாதுகாப்பு மற்றும் தரநிர்ணயச்சட்டம் 2006–ல் தண்டனை பிரிவு–51 மற்றும் 52 ஆகியவற்றில் முறையே தரக்குறைவு மற்றும் தப்புக்குறியீடான உணவுப்பொருட்களை தயாரித்தாலோ, விநியோகம் செய்தாலோ, அல்லது விற்பனை செய்தாலோ தரக்குறைவு பொருட்களுக்கு அபராதமாக ரூ.5 லட்சம் வரையிலும், தப்புக்குறியீடு உள்ள பொருட்களுக்கு ரூ.3 லட்சம் வரையிலும் அபராதம் விதிக்கலாம் என தெரிவிக்கப்பட்டுள்ளது.

அதன்படி தஞ்சாவூர் மாவட்டத்தில் உணவு பாதுகாப்பு தரநிர்ணயச் சட்டம் 2006–ன் கீழ் தஞ்சாவூர் மாவட்டத்தில் இயங்கிவரும் 7 வணிக நிறுவனங்களில் பொதுமக்களுக்கு விற்பனை செய்யப்பட்ட உணவு பொருட்கள் தரமற்றதாகவும், தப்புக்குறியீட்டுடன் விற்பனை செய்யப்பட்டது என்று உணவு பாதுகாப்பு அலுவலர்களால் கண்டறியப்பட்டதால் உணவு பாதுகாப்பு தரநிர்ணய சட்டம்–2006–ன் கீழ் தஞ்சாவூர் மாவட்ட வருவாய் அலுவலர், கூடுதல் மாவட்ட நடுவர் மற்றும் தீர்ப்பு அலுவலரால் விசாரணை மேற்கொள்ளப்பட்டு குற்றச்செயலில் ஈடுபட்ட கடை உரிமையாளர்கள் மற்றும் விற்பனையாளர்கள் ஆகியோருக்கு ரூ.3 லட்சத்து 3,65 ஆயிரம் அபராதம் விதிக்கப்பட்டது.

எனவே தரமற்ற உணவுப் பொருட்களை தயாரித்தல், விநியோகித்தல் மற்றும் விற்பனை செய்தல் போன்ற குற்ற நிகழ்வுகளில் ஈடுபடும் விற்பனை நிலையங்களின் பேரில் பொதுமக்கள் விழிப்புணர்வுடன் இருக்குமாறும், தரமான பொருட்கள் வாங்கிடுமாறும் தஞ்சாவூர் மாவட்ட கலெக்டர் சுப்பையன் கேட்டுக்கொண்டுள்ளார்.

Categories: DISTRICT-NEWS, Thanjavur