Home > NEWS > உணவுகளில் செயற்கை வண்ணம் சேர்க்கக்கூடாது’

உணவுகளில் செயற்கை வண்ணம் சேர்க்கக்கூடாது’

28,September, 2015

பொள்ளாச்சி: ”உணவுப்பொருட்களில் செயற்கை வண்ணம் சேர்க்கக்கூடாது,” என ஆலோசனை கூட்டத்தில் உணவு பாதுகாப்பு நியமன அலுவலர் தெரிவித்தார்.
துரித உணவகம், ஓட்டல்கள் கடைபிடிக்க வேண்டிய வழிமுறைகள், இவ்வணிக வளாகங்களில் கடைபிடிக்க வேண்டிய டெங்கு மற்றும் பன்றிக்காய்ச்சல் முன்னெச்சரிக்கை தடுப்பு நடவடிக்கைகள் குறித்து, பொள்ளாச்சி உணவு பாதுகாப்பு அலுவலர்கள் அலுவலகத்தில், ஆலோசனை கூட்டம் நடந்தது.
உணவு பாதுகாப்பு மற்றும் மருந்து நிர்வாகத்துறை (உணவு பாதுகாப்பு பிரிவு) மாவட்ட நியமன அலுவலர் கதிரவன் பேசியதாவது: பணியாளர்கள் கண்டிப்பாக மருத்துவ சான்று பெற்றிருக்க வேண்டும். உணவுப்பொருட்களில் கண்டிப்பாக செயற்கை வண்ணம் சேர்க்கக்கூடாது. பணியாளர்களின் தன்சுத்தம் சரியாக பராமரிக்க வேண்டும். டீத்துாளில் செயற்கை வண்ணம் சேர்க்கை கூடாது.
சமையலறையில் உள்கட்டமைப்பை மேம்படுத்த வேண்டும். சமைத்த அசைவ உணவுப்பொருட்களை மறுநாள் சூடாக்கி கொடுக்கக்கூடாது. பூச்சிகளை கட்டுப்படுத்த, முறையாக பயிற்சி பெற்ற நபர்களை கொண்டு உரிய கால முறை இடைவெளியில் பூச்சிகளை கட்டுப்படுத்த வேண்டும். சமையலுக்கு பயன்படுத்தும் மூலப்பொருட்களை பாதுகாப்பான முறையில் சேமிக்க வேண்டும். மூலப்பொருட்கள் வாங்கும் பதிவேடு முறையாக பராமரிக்க வேண்டும். சமைத்த உணவுப்பொருட்களை புட் கிரேடு பாலித்தீன் கொண்டு தான் பார்சல் செய்ய வேண்டும்.
பண்டிகை காலங்களில் தயாரிக்கப்படும் இனிப்பு மற்றும் கார வகைகள் தரமான எண்ணெய் மற்றும் நெய்யினால் தயாரிக்க வேண்டும். டெங்கு மற்றும் பன்றி காய்ச்சல் முன்னெச்சரிக்கை நடவடிக்கையாக, மேல்நிலைத்தொட்டி, கீழ்நிலைத்தொட்டிகளை இரண்டு வாரத்திற்கு ஒரு முறை சுழற்சி முறையில் சுத்தப்படுத்த வேண்டும். பதிவேடு பராமரிக்க வேண்டும்.
தேவையற்ற பொருட்களை அவ்வப்பொழுது அப்புறப்படுத்த வேண்டும். தேங்காய் சிரட்டை, டீ கப் போன்ற எளிதில் நீர் தேங்கும் பொருட்களை உடனுக்குடன் அப்புறப்படுத்த வேண்டும். கை கழுவும் இடங்களில், சோப்பு அல்லது சோப்பு திரவம் மற்றும் கை துடைப்பதற்கு கை துடைப்பான் வைத்திருக்க வேண்டும்.
உணவு உண்ணும் மேசையோரங்கள், நாற்காலி கைபிடிகளை சரியான கிருமிநாசினி கொண்டு அவ்வப்போது துாய்மைபடுத்த வேண்டும். உணவகம் மற்றும் ஓட்டல்களில், மழை நீர் மற்றும் தண்ணீர் தேங்கா வண்ணம் பராமரிக்க வேண்டும். இவ்வாறு அவர் பேசினார். இதில், உணவு பாதுகாப்பு அலுவலர்கள் கோவிந்தராஜ், சுப்புராஜ், செந்தில்குமார், காளிமுத்து, செல்வபாண்டியன் மற்றும் உணவகம், ஓட்டல் உரிமையாளர்கள் உள்ளிட்ட பலர் பங்கேற்றனர்.

Categories: NEWS
  1. 28,September, 2015 at 10:25 pm

    Recently FSSAI added few of food color in row for food products. Earlier product like Ice cream, Indian sweets and savories are allowed to have color approved by FSSAI. But, in the row few food color approved by FSSAI to have in food products.

  1. No trackbacks yet.
Comments are closed.
%d bloggers like this: