Home > DISTRICT-NEWS, Thanjavur > கும்பகோணத்தில் தனியார் உணவகத்தில் 750 கிலோ ரேசன் அரிசி பறிமுதல்

கும்பகோணத்தில் தனியார் உணவகத்தில் 750 கிலோ ரேசன் அரிசி பறிமுதல்

9,July, 2017

கும்பகோணத்தில் தனியார் உணவகத்தில் பதுக்கி வைக்கப்பட்டிருந்த 750 கிலோ ரேசன் அரிசியை உணவு பாதுகாப்புத் துறை அலுவலர்கள் வெள்ளிக்கிழமை மாலை பறிமுதல் செய்தனர்.
கும்பகோணத்தில் வெள்ளிக்கிழமை மாலை ஹோட்டல்கள், சிறு உணவு விடுதிகளில் காலாவதியான பொருள்கள் உபயோகப்படுத்தபட்டு வருகிறதா, தரமான பொருள்களை கொண்டு உணவு சமைக்கப்படுகிறதா என தஞ்சாவூர் மாவட்ட உணவு பாதுகாப்பு நியமன அலுவலர் ரமேஷ்பாபு மற்றும் உணவு ஆய்வாளர்கள் மகேஷ், சந்திரமோகன் உள்ளிட்ட குழுவினர் அனைத்து உணவு விடுதிகள் மற்றும் ஹோட்டல்களில் அதிரடி சோதனை நடத்தினர்.
இதில் பல ஹோட்டலில் காலாவதியான பிஸ்கட், சாக்லேட், குளிர்பானம் என சுமார் ரூ. 25 ஆயிரம் மதிப்புள்ள உணவுப் பொருள்கள் வைத்திருந்தது கண்டறியப்பட்டது. இதையடுத்து அவை பறிமுதல் செய்யப்பட்டு அழிக்கப்பட்டன.
இதே போல் கும்பகோணம் புதிய பேருந்து நிலையம், 60 அடி சாலையில் உள்ள தனியார் உணவகத்தில் சோதனை செய்த போது, அங்கு அனுமதியின்றி 750 கிலோ எடையுள்ள ரேசன் அரிசி வைத்திருந்தது தெரியவந்தது.
இதையடுத்து உணவு பாதுகாப்பு நியமன அலுவலர் ரமேஷ்பாபு, ரேசன் அரசியை பறிமுதல் செய்து, சார்ஆட்சியர், வட்டாட்சியர் மற்றும் வட்ட வழங்கல் அலுவலருக்கு தகவல் அளித்தார். தகவலின் பேரில் சம்பவ இடத்துக்கு வந்த கும்பகோணம் வட்ட வழங்கல் அலுவலர் வாசுதேவனிடம், பறிமுதல் செய்யப்பட்ட ரேசன் அரிசி 750 கிலோ ஒப்படைக்கப்பட்டது. மேலும் ரேசன் அரிசியை பதுக்கி வைத்திருந்த உணவக உரிமையாளர் குமரகுரு மீது நடவடிக்கை எடுக்கவும் பரிந்துரை செய்யப்பட்டது.

Categories: DISTRICT-NEWS, Thanjavur
%d bloggers like this: